حين تكلمت بنت الشهيد

في الندوة الختامية للمرشح عبد الوهاب الهارون اليوم الثلاثاء 27 يونيو 2006

كان لبنت الشهيد أحمد قبازرد كلمة أبكت الحضور

قالت شروق
مسّاكم الله بالخير
أنا بنتكم..إختكم..جارتكم..بنت الكويت...بنت الضاحية ....شروق أحمد قبازرد
عمري 22 سنة قضيت منها 16 سنة بدون أبوي الشهيد أحمد قبازرد
وعلى كثر ماني فخورة فيه على كثر ما أتحسف لما أشوف حال الكويت اللي بذل روحه لها
......

أبوي ...وكل شهداء الكويت الأحرار ضحوا بدمهم عشان الكويت
لكن أكيد كويت أفضل من اللي إحنا عايشين فيها
ما كانوا يبونها ترجع من إيد صدّام وتطيح بإيد ناس تشبه صدام ..... ناس منّا وفينا....ما كانوا يبون يشوفون الكويت تِـنّهب من عيالها
أتحسّر وأنا اقرأ الجرايد.......أتحسّر وأنا أتابع الفضايح........وأترحم على أبوي.....وأقول حسافة عليك يبه .... ليتك ويانا
بس أرجع أتعوذ من الشيطان وأقول: لا...لا الكويت تستاهل
الكويت فيها ناس نظاف.......وطنيين.......شرفاء......يشتغلون لها من كل قلبهم
الكويت فيها عبد الوهاب الهارون
هذا الرجل اللي قررت أنضم للجنته النسائية وأشتغل له ما يربطني فيه إلا أني أعتقد أنه يحب الكويت كثر أبوي الله يرحمه ما كان يحبها

المرحلة صعبة......وهذا مو رايي آنا ......الكل مجمع على أنها صعبة.....عشان جذي....يبي لها رجال عرفناهم
خبرناهم.......جربناهم.....يبي لها رجال مواقفهم تشهد لهم.......يبي لها رجال ما يتلونون.......رجال ما يدورون مصالحهم......رجال ما يخافون......رجال ما ينشَرون بكنوز الدنيا.....رجال ثابته......رجال مثل الهارون

اللي إيده في الماي مو مثل اللي إيده في النار.......وأنا كبنت شهيد ما أبي أجازف.....وبأقولها بصوت عالي
الهارون هو رجل هذه المرحلة......راح انتخبه......وأحط راسي على المخدة وضميري مرتاح

وأطلب من الله إنه ترسي سفينة الكويت على بر الأمان والحرية والكرامة
.....................................

تحديث فجر 30 يونيو 2006

يا أهل الضاحية

خيبتوا ظنّا وظن بنت الشهيد